Margaret Chan, framkvæmdastjóri Alþjóðaheilbrigðisstofnunarinnar WHO, sagði við setningu ráðstefnu um svínaflensuna (H1N1) í Cancuní Mexókó í morgun að ómögulegt væri að hefta útbreiðslu flensunnar úr þessu. Þetta kemur fram á fréttavef BBC.

„Eins og við sjáum í dag, þegar tilkynnt hefur verið um tilfelli í rúmlega hundrað löndum, er ómögulegt að stöðva útbreiðsluna þegar veira sem fær er um að valda heimsfaraldri kemur upp,” sagði hún. Fram kom á fundinum að áætlað væri að 100.000 tilfelli veikinnar kæmu daglega upp í Bretlandi í sumarlok.

Flensan kom fyrst upp í Mexíkó en forsvarsmenn WHO segja að það að ráðstefnan sé haldin í Mexíkó sýni það traust sem þeir beri til yfirvalda í landinu.

„Mexíkó er öruggur staður og fallegur og hlýlegur glæsilegur  staður til að heimsækja,” sagði Chan.

Veiran hefur nú greinst í öllum heimsálfum en í flestum tilfellum hafa einkenni veikinnar verið mild. Skæðustu tilfelli flensunnar hafa komið upp meðal barnshafandi kvenna og fólk með önnur heilsufarsvandamál. Þó hefur fullfrískt fólk einnig látið lífið úr flensunni. 

„Eitt mest ögrandi verkefni okkar, þegar upp kemur frekar mildur heimsfaraldur, er að aðstoða fólk við að gera sér grein fyrir því hvenær ástæða er til að hafa áhyggjur og hvenær ástæða er til að leita neyðaraðstoðar,” sagði Chan.