Ban Ki-moon, framkvæmdastjóri Sameinuðu þjóðanna, hvatti í morgun allar þjóðir til að virða grundvallar mannréttindi og leysa innanríkisdeilur með friðsamlegum hætti. Sagði hann þetta er hann var beðinn um viðbrögð við fréttum af átökum í Xinjiang-héraði í Kína.

„Hvað svo sem er að gerast eða hefur gerst þá er afstaða Sameinuðu þjóðanna og framkvæmdastjóra þeirra staðföst og skýr: Sú að leysa beri allan ágreining friðsamlega, hvort sem um er að ræða innanríkis eða milliríkjamál,” sagði hann.

 „Þær ríkisstjórnir sem hlut eiga að máli verða einnig að gæta þess að koma fram af varkárni og gæta að lífi og öryggi almennra borgara, menningu þeirra og eigum, tjáningarfrelsi, frelsi til að koma saman og nálgast upplýsingar."

Að minnsta kosti 140 eru sagðir hafa fallið í óeirðum Uighura, sem eru íslamskrar trúar, í Xinjiang héraði í Kína um helgina en um er að ræða  mannskæðustu óeirðir sem tengjast þjóðernisátökum í landinu í áratugi. Rúmlega 800 manns eru sagðir hafa slasast í átökunum og mörg  hundruð hafa verið handteknir vegna þátttöku í þeim.