Belgíska flutningaskipið Pompei er eitt þeirra skipa sem sómalskir sjóræningjar hafa náð á sitt vald á Aden flóa það sem af er ári. Skipinu var rænt um miðjan apríl en ræningjarnir létu það af hendi 28. júní síðastliðinn. HO

Sómalskir sjóræningjar náðu í morgun á sitt vald tyrknesku olíuflutningaskipi á Aden flóa. Um borð er 23 manna áhöfn en skipið var á leið frá Sádí Arabíu til Jórdaníu.

Sjóræningjar á gúmmítuðrum létu til skarar skríða í birtingu í morgun. Þeir komu á þremur bátum að Horizon I en skipið er í eigu samnefnds skipafélags í Istanbul. Þremur vopnuðum sjóræningjum tókst að komast um borð í Horizon og yfirbuga áhöfnina.

Skipið heldur að sögn talsmanna eigenda þess kúrs og engar kröfur hafa verið settar fram af hálfu sjóræningjanna.

Tímasetning sjóránsins kemur nokkuð á óvart en monsún rigningartíminn stendur nú sem hæst og sjórinn á Aden flóa er því nokkuð úfinn.

Sjórán hafa verið tíð á Aden flóa og er siglingaleiðin talin ein sú hættulegasta í heimi. Stjórnleysi hefur að mestu ríkt í Sómalíu frá árinu 1991. Bráðabirgðabirgðastjórn sem nýtur stuðnings alþjóðasamfélagsins situr þar nú. Hún ræður hins vegar ekki nema hluta landsins þar sem íslamistar hafa náð hlutum þess á sitt vald á ný eftir að eþíópískar hersveitir hurfu frá landinu i byrjun árs.

Frá áramótum hafa sómalskir sjóræningjar rænt á þriðja tug skipa úti fyrir ströndum landsins og haldið á fimmta hundrað manns í gíslingu. Talið er að 12 skip séu enn á valdi sjóræningja og um 200 manns í gíslingu þeirra.

Lítið lát er á sjóránum á Aden flóa þrátt fyrir að Evrópusambandið hafi í júní samþykkt að herða aðgerðir gegn sjóræningjum. Rúmlega tuttugu skip Breta, Frakka, Þjóðverja, Ítala og fleiri Evrópusambandsþjóða halda nú uppi eftirliti á um tveggja milljóna ferkílómetra svæði á flóanum.