Uighur-menn standa vörð við inngang hverfis síns í Urumqi. Reuters

Æðstu ráðamenn í Xinjiang-héraði í Kína segja að ástandið í höfuðborginni Urumqi sé nú undir stjórn eftir að þúsund hermanna liðsauki var sendur þangað. Þá segir hann að þeir sem fundnir verði sekir um manndráp í óeirðum í borginni að undanförnu verði teknir af lífi. Þetta kemur fram á fréttavef BBC. 

Til átaka hefur komið á milli Uighur-manna sem eru í minnihluta í héraðinu og Han-Kínverja annars vegar og hermanna hins vegar í borginni á undanförnum dögum. Yfirvöld segja að 156 hafi látið lífið í átökum í borginni á sunnudag og að flestir þeirra hafi verið Han-Kínverjar. Talsmenn Uighur-manna segja hins vegar mun fleiri hafa látið lífið og staðhæfa að um 90% hinna látnu hafi verið Uighur-menn.

Hu Jintao, forseti Kína, stytti í  dag ferð sín á leiðtogafund G8 ríkjanna á Ítalíu vegna málsins. Quentin Sommerville, fréttamaður BBC í Xinjiang, segir yfirvöld þar hafa verið undir miklum þrýstingi að ná stjórn á ástandinu til að valda ekki Hu þeirri skömm að þurfa að yfirgefa fundinn. 

Jerla Isamudin, borgarstjóri í Urumqi, sagði á blaðamannafundi í dag að ástandið í borginni sé nú undir stjórn og Li Zhi, leiðtogi Kommunistaflokksins í borginni, sagði á sama fundi að allir þeir sem uppvísir verði að manndrápum þar verði teknir af lífi. Þá sagði hann fjölmarga hafa verið handtekna vegna gruns um manndráp.  

Zhi hvatti alla og þá sérstaklega Han-Kínverja til að sýna stillingu en til átaka hefur komið á milli hermanna og Han-Kínverja, sem hafa mótmælt því hversu margir úr þeirra hópi hafi verið handteknir.   

Talið er að rúmlega 1.400 manns hafi verið handteknir í borginni frá því óeirðirnar brutust út. Eru flestir þeirra sagðir vera námsmenn.