Talið er að um 800 þúsund hafi verið myrtir í þjóðarmorðinu í Rúanda. Reuters

Sænsk stjórnvöld ætla að framselja rúandískan ríkisborgara til Rúanda þar sem hann verður leiddur fyrir dóm. Maðurinn er sakaður um að hafa tekið þátt í þjóðarmorðinu í Rúanda 1994.

Maðurinn heitir Sylvera Ahorugeze og er 53 ára gamall. Hann var yfirmaður flugmálastjórnar Rúanda á árum áður.  Að sögn sænskra stjórnvalda verður Ahorugeze framseldur innan þriggja vikna frá því að saksóknarar í Rúanda fá ákvörðun Svía formlega í hendur.

Beatrice Ask, dómsmálaráðherra Svía, greindi frá ákvörðun sænsku ríkisstjórnarinnar í morgun. „Svíþjóð er fyrsta Evrópulandið sem framselur grunaðan þjóðarmorðingja til Rúanda. Ákvörðunin var ekki auðveld,“ sagði dómsmálaráðherrann.

Hæstiréttur Svíþjóðar úrskurðaði 27. maí að Ahorugeze gæti farið til heimalands síns og komið þar fyrir rétt. Ekkert, hvorki í sænskum né evrópskum lögum, stæði í vegi fyrir því að þeir sem grunaður væru um þjóðarmorð væru framseldir.

Ahorugeze hefur verið flóttamaður í Danmörku frá 2001. Hann var handtekinn í júlí 2008 þegar hann þekktist í sendiráði Rúanda í Svíþjóð. Ríkisstjórn Rúanda krafðist framsals hans mánuði síðar. 

Ahorugeze er grunaður um að hafa verið einn af leiðtogum öfgahreyfingar Hútúa sem tók þátt í þjóðarmorðinu. Hann er einnig grunaður um að hafa myrt 28 Tútsa í úthverfi Kigali, höfuðborgar Rúanda, 7. apríl 1994.

Öfgasinnaðir Hútúar myrtu um 800 þúsund manns, aðallega úr minnihluta Tútsa en einnig hófsama Hútúa, meðan á 100 daga þjóðarmorðinu stóð.