Mótmælendur bera grímur með myndum af leiðtogum G-8 ríkjanna í Róm á ítalíu. Reuters

Leiðtogafundur átta helstu iðnríkja heims (G-8) fjallar í dag um hugsanlega aðild svokallaðra G-5 ríkja að loftslagssáttmála samtakanna sem leiðtogarnir samþykktu í gær. Þá mun Barack Obama stýra málfundi um efnahagsmál síðar í dag. Þetta kemur fram á fréttavef BBC. 

Ríkin fimm, sem um ræðir, eru Brasilía, Indland, Kína, Mexíkó og Suður–Afrík en fréttaskýrendur segja að samningaviðræður við þau geti reynst mjög erfiðar. Á það sérstaklega við um Kína ekki síst þar sem Hu Jintao Kínaforseti yfirgaf  fundinn í gær vegna ástandsins í Xinjiang sjálfstjórnarhéraðinu. 

Þá hafa Indverjar þegar tekið undir gagnrýni Ban Ki-moon, framkvæmdastjóra Sameinuðu þjóðanna, þess efnis að markmið G-8 ríkjanna miðist við of langt tímabil.  

Barack Obama Bandaríkjaforseti sagði þó á fundi með Luis Inacio Lula da Silva, forseta Brasilíu, í gær að enn væri tími til að ná samkomulagi á milli iðnríkjanna og þróunarríkja fyrir loftslagsráðstefnu Sameinuðu þjóðanna í Kaupmannahöfn í nóvember.

Silvio Berlusconi, forsætisráðherra Ítalíu og gestgjafi á fundinum, hefur einnig lýst þeirri skoðun sinni að slíkur sáttmáli þurfi bæði að ná til iðnríkjanna og þróunarlanda.

„Það er ekki árangursríkt að Evrópulöndin, Japan,  Bandaríkin og Kanada fallist á samdrátt sem hefur skaðleg áhrif á efnahag þeirra á meðan meira en fimm milljarðar manna í öðrum löndum láta eins og ekkert hafi í skorist,” sagði hann.