Ban Ki-moon, framkvæmdastjóri Sameinuðu þjóðanna hefur gagnrýnt leiðtoga sem sitja leiðtogafund G-8 ríkjanna í L'Aquila á Ítalíu, fyrir að setja sér ekki háleitari markmið í loftslagsmálum en raun ber vitni. Þetta kemur fram á fréttavef BBC. 

Leiðtogarnir samþykktu í gær að stefna að því að minnka útblástur gróðurhúsalofttegunda í heiminum um helming fyrir árið 2050. Er iðnríkjunum ætlað að bera hitann og þungann af þeim aðgerðum með því að draga úr mengun heima fyrir um 80% á þessum tíma.  

Ban segir hins vegar nauðsynlegt að draga fljótar úr losun. Þá hvetur hann leiðtogana til að setja sér ákveðið áfangamarkmið sem miðist við árið 2020.

 „Þetta er pólitísk og siðferðisleg, afdráttarlaus og söguleg skylda leiðtoganna við framtíð mannkynsins og jafnvel við framtíð jarðarinnar,” sagði hann í viðtali við BBC. 

Einnig hvatti hann leiðtogana til að leggja fram hugmyndir að aðgerðum sem geti stuðlað að takmörkun útblásturs meðal fátækari þjóða og til að aðstoða þær við að bregðast við afleiðingum loftslagsbreytinga.