Levi Johnston með Bristol Palin AP

Hinn nítján ára Levi Johnston, sem um tíma var trúlofaður dóttur Sörah Palin, ríkisstjóra í Alaska, segist telja að ákvörðun hennar um að láta af starfi ríkisstjóra tengist fjármálum. Johnston á barn með hinni átján ára Bristol Palin og bjó á heimili  fjölskyldu hennar frá því í desember á síðasta ári og fram í janúar.

Á þeim tíma segist hann oft hafa heyrt Palin tala um það hversu gott væri að geta nýtt sér eitthvað af öllum þeim tilboðum sem hún hefði fengið frá því hún var valin varaforsetaefni repúblíkana í síðustu forsetakosningum.

„Ég held að aðalmálið hafi verið bókin. Þar voru milljónir dollara í boði,” sagði Johnston á blaðamannafundi sem hann hélt á skrifstofu lögfræðings síns í gær.

Lögfræðingurinn Rex Butler, segir Johnston hafa ákveðið að tjá sig um málið þar sem Alaskabúar vilji fá að vita raunverulegu ástæðuna að baki afsagnar Palin.

Sjálfur mun Johnston einnig vera í samningaviðræðum um að gefa út sögu sína auk þess sem hann reynir nú að koma sér á framfæri í kvikmyndaheiminum.

Meghan Stapleton, talsmaður Palin fjölskyldunnar, gerir lítið úr yfirlýsingum hans. „Það er áhugavert að heyra að Levi skuli vera að vinna að skáldsögu á sama tíma og hann æfir leiklistarhæfileika sína,” segir hún í yfirlýsingu.