Í Tennesse má vafalaust herja út nokkurn afslátt á hádegismatnum með svona fallbyssu. AP

Í kjölfar fjölda skotárása í Bandaríkjunum ætla stjórnvöld í Tennessee í Suðurríkjunum að breyta vopnalöggjöf sinni. Þau ætla að slaka á hömlum á vopnaburði.

Frá þessu segir á vef BBC í dag.

Verði fyrirhugaðri löggjöf ekki hnekkt munu íbúar Tennessee-ríkis frá og með morgundeginum fá mun rýmri heimildir til að bera á sér skotvopn. Meðal annars verður heimilt að bera á sér skotvopn á krám og veitingastöðum. Hinum vopnuðu verður þó blessunarlega ekki heimilt að kaupa áfengi.

Þingmaður Tenessee, Doug Jackson, segir fólk hræðast morgundaginn. Málið snúist um rétt þess til að verja sig og fjölskyldu sína, lögin veiti öryggi á ólgutímum.

Nikki Goeser, íbúi í Nashville, er meðal 250.000 skráðra skotvopna eigenda í Tennessee. Hún horfði upp á mann sinn skotinn til bana í apríl. Hún telur að réttur hennar til vopnaburðar hafi verið skertur þegar mest lá við með þessum afleiðingum.

„Byssa getur drepið, en í réttum höndum getur hún verið notuð til að bjarga mannslífum. Mér er ekki svo umhugað um líf vonda mannsins,“ segir Goeser sem kveðst vopnuð og vita hvað hún syngur.

Randy Rayburn rekur veitingastað í borginni og líst illa á að viðskiptavinir hans geti borið vopn en hann fer fyrir hópnum sem vill fá lögunum hnekkt. Telur hann lögin stofna lífi og limum hans og starfsfólks hans í hættu.

„Já, þau eru óttaslegin, ég er óttasleginn, konan mín óttast um öryggi okkar,“ segir Rayburn. „Við þörfnumst ekki sjálfskipaðra laganna varða inni á staðnum mínum. Ég er byssueigandi, ég á byssu á heimili mínu en ég hef hana þar, ekki á opinberum stöðum þar sem lífi fjölda fólk getur verið ógnað.“

Lögreglustjóri Nashville, Ronal Serpas, er á sama máli og Rayburn. Hann telur að lögin muni skapa hættu á veitingastöðum og öldurhúsum.

Rayburn hefur sett upp skilti í glugga veitingastaðar síns sem á stendur „engar byssur leyfðar.“