Tuttugu og einn lögreglumaður hefur nú slasast í átökum við kaþólikka sem reynt hafa að koma í veg fyrir göngur Óraníureglunnar á Norður-Írlandi frá því í gær. Þetta kemur fram á fréttavef Sky.

Átökin brutust fyrst út í Ardoyne í norðurhluta Belfast er lögregla reyndi að rýma gönguleið Óraníureglunnar um klukkan hálf sjö að staðartíma í gær.

Kaþólikkar köstuðu m.a. bensínsprengjum og steinum að lögreglumönnum og skutu flugeldum að þeim og i gærkvöldi voru níu lögreglumenn sagðir slasaðir eftir átökin. Lögregla skaut hins vegar AEP-kúlum og beitti vatnsúðatækjum við að dreifa mannfjöldanum í Ardoyne.

Til átaka hefur einnig komið á milli lögreglu og kaþólikka í Londonderry og  Rasharkin í County Antrim og eru átökin nú mestu átök sem brotist hafa út í tengslum við göngur sambandssinna á Norður-Írlandi í fimm ár.

Alistair Finlay, aðstoðarlögreglustjóri á Norður Írlandi segir átökin valda miklum vonbrigðum. „Um allt Norður-Írland hafa verið haldnar nokkur hundruð göngur sem farið hafa friðsamlega fram. Fólk, sem ekki tók þátt í göngunum fékk því að halda áfram lífi sínu án truflunar,” segir hann.

„Það veldur miklum vonbrigðum að litlir hópar fólks í Norður- Belfast, Derry, Armagh, Rasharkin og öðrum hlutum Norður-Írlands skuli sýna samfélögunum þar slíkt tillitsleysi. Þeir hafa sýnt Norður-Írland í sinni verstu mynd. Það er mynd þröngsýni, aðskilnaðar og umburðarleysis og hún er ekki í takt við hugsunarhátt meirihluta íbúanna sem hafa lagt slíkt að baki sér og horfa nú til friðsamlegrar framtíðar."