Til átaka kom á milli mótmælenda og lögreglu við Teheran-háskóla í Íran í dag eftir að Ali Akbar Rafsanjani, fyrrum forseti landsins, flutti ávarp í mosku við háskólann. Þetta kemur fram á fréttavef BBC.  

Lögregla beitti táragasi og kylfum til að dreifa þúsundum mótmælenda sem komu saman við háskólann en fólkið hrópaði m.a. nafn forsetaframbjóðandans Mir Hossein Mousavi og „Dauði fyrir harðstjórann.” Þá báru margir mótmælendur grænar slæður og borða  til marks um stuðning sinn við Mousavi. 

Nokkrir eru sagðir hafa verið handteknir þeirra á meðal kvenréttindakonan Shadi Sadr. 

Rafsanjani sagði m.a í ávarpi sínu að stór hluti írönsku þjóðarinnar efist enn um niðurstöðu forsetakosninganna sem fram fóru í landinu í júní og að eitthvað yrði að gera til að draga úr efasemdum fólks. Þá sagði hann óþarfi að halda mótmælendum fangelsuðum og að takmarka starfsemi fjölmiðla. 

Bæði Mousavi og forsetaframbjóðandinn Mehdi Karoubi voru viðstaddir bænastundina og segir sonur Karoubi föður sinn hafa orðið fyrir aðkasti lögreglumanna er hann mætti til hennar.  

Mótmælaaðgerðirnar í dag eru fyrstu mótmælagerðirnar í landinu í rúma viku en fyrir bænastundina höfðu yfirvöld varað stjórnarandstöðuna í landinu við því að skapa „svið óæskilegra atburða” í tengslum við hana. 

Til mikilla átaka kom í Teheran í síðasta mánuði eftir að Mahmoud Ahmadinejad, forseti landsins, var lýstur sigurvegari forsetakosninganna sem fram fóru þann 12. júní.

Eru a.m.k. tuttugu mótmælendur sagðir hafa látið lífið í átökum við lögreglu og hundruð voru handteknir.