Karlmaður, sem ákærður hefur fyrir aðild að sprengjutilræðunum í Mumbai á Indlandi í nóvember í fyrra, játaði í morgun að hafa tekið þátt í árásunum. Hann hafði áður játað en dró játningu sína til baka er réttarhöldin yfir honum hófust í apríl. Sagði lögfræðingur hans þá að skjólstæðingur sinn hafi verið þvingaður til að játa.

Mohammed Ajmal Kasab, 21 árs, sagði fyrir sérstökum fangelsisrétti í morgun, að hann vildi játa aðild sína að tilræðunum. Hann fór síðan yfir skipulagningu hryðjuverkanna og greindi frá ferðalagi sínu og hinna árásarmananna frá Pakistan.

Samkvæmt indverskum fjölmiðlum kom játning Kasab lögfræðingi hans að óvörum. Talið er að hann hafi ákveðið að játa eftir að 134 vitni hafi vitnað að hann hafi tekið þátt í árásunum. Jafnfram hefur lífsýni úr honum verið lagt fram sem og fingraför við réttarhöldin sem hafa staðið yfir síðan í apríl.

Alls létust 166 í tilræðunum í Mumbai og yfir 300 særðust víðsvegar um borgina. Þar á meðal á tveimur stórum hótelum, veitingastöðum og á brautarstöð.  Kasab og félagi hans hófu skothríð og vörpuðu handsprengjum að fólki á Chhatrapati Shivaji brautarstöðinni í Mumbai. Alls létust 52 á brautarstöðinni og 109 særðust. Sást Kasab og félagi hans á myndum sjónvarpsstöðva skjóta á allt sem fyrir þeim varð.

Kasab, sem jafnframt kom sprengju fyrir í leigubifreiðinni sem ók honum á brautarstöðina, var sá eini af tíu hryðjuverkamönnunum sem lifði árásirnar af. Sprengjan í leigubifreiðinni sprakk síðan í nágrenni flugvallarins í Mumbai og lést bæði bílstjórinn og farþegi sem var í bifreiðinni.

Hryðjuverkamennirnir voru þjálfaðir af pakistönsku hryðjuverkasamtökunum Lashkar-e-Taiba (LeT).