Barack Obama Bandaríkjaforseti var kátur á blaðamannafundi í Hvíta húsinu í gær. Reuters

Barack Obama Bandaríkjaforseti segir að lögregla hafi komið kjánalega fram er hún handtók svarta fræðimanninn Henry Louis Gates Jr. Þá segir hann þá íbúa Bandaríkjanna sem eru af afrískum og rómönskum uppruna enn eiga á hættu að vera handteknir án þess að tilefni sé til.

Obama sagði í gær að Gates væri vinur sinn en að hann þekkti ekki allar aðstæður málsins. Hann teldi þó að það myndi reita hvern sem væri til reiði að verða fyrir framkomu eins og þeirri sem Gates hefur lýst.

Gates, sem er prófessor við Harvard háskóla, segist hafa verið handtekinn á heimili sínu eftir að vegfarandi sá hann brjóta upp hurð á heimili hans og tilkynnti lögreglu. Hann var síðan ákærður fyrir ósæmilega framkomu en ákæran á hendur honum síðan dregin til baka.

Lögregla segir hann upphaflega hafa neitað að verða við kröfu lögreglu um að hann sýndi skilríki og að hann hafi síðan sakað lögreglumennina um kynþáttafordóma. „Það var kjánalegt af lögreglunni í Cambridge að handtaka mann sem hafði sýnt skilríki til staðfestingar á því að hann væri á eigin heimili,” sagði Obama.

„Ég held að við vitum það, burtséð frá þessu atviki, að það á sér langa sögu hér í landinu að fólk af afrískum og rómönskum uppruna verður frekar fyrir afskiptum lögreglu en aðrir. Þetta er bara staðreynd.”  

Obama gerði einnig grín að málinu og sagði að gleymdi hann lyklunum sínum að heimili sínu í Hvíta húsinu og reyndi að brjóta upp hurðina yrði hann sennilega skotinn.