Dómari á Indlandi hefur úrskurðað að réttarhöld yfir Mohammad Ajmal Amir Qasab, sem sakaður er um aðild að sprengjutilræðunum íMumbai í nóvember á síðasta ári skuli halda áfram þrátt fyrir játningu hans. Þetta kemur fram á fréttavef BBC. 

Ákvörðun dómarans ML Tahiliyani er byggð á því að játningin nái ekki til allra 86 ákæruatriðanna gegn honum.

„Eins og stendur ætla ég ekki að kveða upp dóm. Hinn ákærði hefur ekki játað öll ákæruatriðin. Hann játar ákveðinn hluta þeirra, játar sig sekan að ákveðnum brotum. Hann hefur ekki játað mörg af 86 ákæruatriðum,” segir hann.

„Ég mun ekki tjá mig um yfirlýsingar hans á þessu stigi þar sem ég tel það ekki nauðsynlegt. Ég hef þegar tilkynnt að réttarhöldin muni halda áfram. 

Qasab, sem er Pakistani, lýsti sig saklausan af ákærunum í maí á þessu ári en 170 manns létu lífið í tilræðunum.

Lögfræðingur hans Abbas Kazmi hefur nú boðist til að segja af sér en hann lýsti því yfir eftir að Qasab játaði á sig aðild að málinu á mánudag og þriðjudag að binda ætti enda á réttarhöldin og kveða strax upp dóm yfir honum. Dómarinn segir það vera sakborningsins og lögfræðing hans að ákveða hvort þeir vinni áfram saman. 

Qasab lýsti því yfir í gær að hann vildi láta hengja sig eftir að saksóknari staðhæfði að játningar hans væru blekkingarleikur sem miðuðu að því að tryggja honum léttari dóm.

Qasab er talinn vera einn tíu árásarmann sem komust lífs af úr tilræðunum og átökum við lögreglu í kjölfar þeirra.