Skógareldar hafa nú skemmt stór landsvæði á Spáni, Ítalíu, Grikklandi  og um helgina var hermaður í frönsku útlendingahersveitinni ásakaður um að hafa kveikt eld sem náði að borgarmörkum Marseille. Á vef BBC kemur fram að 15 hafi verið handteknir á Spáni, grunaðir um að hafa kveikt elda.

Tugþúsundir hektara lands hafa eyðilagst í S-Evrópu og slökkviliðsmenn vinna allan sólarhringinn við slökkvistarf. Margir sjálfboðaliðar hafa boðið fram krafta sína og flugvélar og þyrlur dreifa stöðugt miklu magni af vatni yfir svæðin.

Á Korsíku hefur slökkvistarf gengið erfiðlega vegna mikilla vinda og þar hafa nú um 6.000 hektarar lands brunnið. Eins gengur slökkvistarf erfiðlega í Grikklandi enda hefur hitinn þar farið yfir 40 stig síðustu daga.

„Við erum ekki farin enn en eldarnir loga hér um 10 metra frá húsunum,“ sagði Lucienne Gaspari íbúi á Korsíku, sem var upptekin við að sprauta vatni á húsið sitt. „Slökkviliðsmennirnir eru á fullu og fólkið er rólegt. Eldarnir eru samt nálægt.“

Hershöfðingi, sem var við stjórn þegar herdeild í frönsku útlendingahersveitinni skaut upp nokkrum glóðarkúlum og olli með því  miklum eld rétt fyrir utan Marseilles, kom fyrir dómara á laugardag. 

Hershöfðinginn, sem er 43 ára og nýkominn heim frá Afganistan, sagðist iðrast mjög verka sinna. Hann var látinn laus gegn tryggingu.