Frönsku forsetahjónin Nicolas Sarkozy og Carla Bruni-Sarkozy Reuters

Forseti Frakklands, Nicolas Sarkozy, sagði við fréttamenn í dag er hann mætti til starfa á ný í Elysee-höll að hann væri við góða heilsu. Eins og fram hefur komið hné forsetinn niður er hann var úti að hlaupa á sunnudag. Þurfti hann að dvelja á sjúkrahúsi eina nótt.

Veikindi forsetans voru minniháttar og tengdust svonefndri flakktaug sem hjálpar líkamanum að stjórna hjartslættinum. Ástandið nefnist æðavíkkunaraðsvif og getur hægt á hjartslættinum og minnkað blóðþrýstinginn.

„Ég vil segja frönsku þjóðinni að ég er við góða heilsu," sagði Sarkozy er hann mætti á ríkisstjórnarfund í morgun. Hann segist þurfa að taka það rólega næstu daga en hét því að láta þjóðina vita ef hann þyrfti að fara aftur á sjúkrahús.

Ríkisstjórnarfundurinn í morgun var sá síðasti í París fyrir sumarleyfi ráðherra. Um helgina ætlar Sarkozy að fara suður á bóginn með eiginkonu sinni, Cörlu Bruni-Sarkozy, en fjölskyldan á hús við Miðjarðarhafið. Ætla forsetahjónin að dvelja þar í þrjár vikur.