Frá fundi mannanna í garði Hvíta hússins í gær. Reuters

Bandaríski háskólaprófessorinn Henry Louis Gates Jr. og lögreglumaðurinn Joseph Crowley, sem hittust í boði Barack Obama Bandaríkjaforseta í garði Hvíta hússins í gær, hafa heitið því að hittast á ný en mennirnir komust í heimsfréttirnar eftir Obama gagnrýndi Crowley fyrir að handtaka Gates á hans eigin heimili. 

 Hvorugur maðurinn bað hinn afsökunar á framkomu sinni á fundinum í gær. Gates, sem er blökkumaður, var handtekinn fyrir ósæmilega hegðun eftir að Crowley var kallaður að heimili hans vegna gruns um að Gates væri að reyna að brjótast þar inn.

Obama baðst heldur ekki afsökunar á framkomu sinni í málinu í gær en hann hefur verið gagnrýndur fyrir að segja á blaðamannafundi að framganga Crowley hafi verið  kjánaleg. Hann hefur þó áður sagt að hann hefði átt að láta áhyggjur sínar af málinu í ljós með öðrum hætti.

Obama sagði við lok fundar þeirra í gær að hann vonaðist til að sem flestir myndu læra af atvikinu. Gates sagði það hafa verið tækifæri fyrir sig til að kynnast þeim erfiðu aðstæðum sem lögreglumenn lendi oft í og fyrir Crowley til að gera sér grein fyrir viðvarandi ótta blökkumanna við kynþáttafordóma.

„Við samþykktum að horfa fram á veginn,” sagði Crowley. „Ég held að það sem þið sáuð í dag hafi verið tveir herramenn sem urðu sammála um að vera ósammála í tilteknu máli."

Fréttaskýrendur hafa gagnrýnt Obama fyrir að nýta ekki tækifærið betur til að ræða samskipti kynþátta í Bandaríkjunum. Aðrir segja hins vegar skiljanlegt að hann vilji semja frið og „sópa málinu sem fyrst undir teppið" þar sem málefnið sé mjög viðkvæmt í Bandaríkjunum.

Þannig leiddi skoðanakönnun Pew Research Center í ljós að 41% þátttakenda voru ósáttir við afskipti Obama af málinu en 29% voru sáttir við þau. Mun meiri óánægja var með afskipti hans á meðal hvítra kjósenda en svartra.