Lögregla segir að fólk hafi þó haft það á tilfinningunni að ekki væri allt með felldu er hún sýndi barnið. Vinir konunnar, Julie Corey, hafi síðan látið lögreglu vita er þeir fréttu að fyrrum nágrannakona hennar Darlene Haynes hefði verið myrt og ófætt barn fjarlægt úr legi hennar.

Corey mun hafa sýnt fjölskyldu sinni og vinum barnið og sagt það sitt. Þá lét hún eins og hún gæfi því brjóst í viðurvist vinanna sem sáu mjólkurduft í fórum hennar. Einnig mun fólki hafa þótt undarlega gengið frá naflastreng barnsins.

Corey, sem er 35 ára, var handtekin með barnið í New Hampshire í Bandaríkjunum á þriðjudag en sleppt gegn 2 milljón dollara tryggingu í gær. Mál hennar verður tekið fyrir hjá dómara þann 30. ágúst.

Corey er sökuð um að hafa rænt barninu af Haynes sem var 23 ára þriggja barna móðir. Haynes fannst látin á heimili sínu í Massachusetts á mánudag eftir að leigusali hennar fann vonda lykt úr íbúð hennar. Hún hafði þá verið látin í nokkra daga.

Corey hefur ekki verið kærð fyrir morðið á Haynes en höfuðáverkar munu hafa verið á líki hennar auk þess sem fóstrið hafði verið rist úr kviði hennar.

Lögregla segir ekki ljóst hvernig dauða Haynes bar að en hún hafði fengið nálgunarbann gegn fyrrum kærasta sínum Roberto Rodriguez nokkrum vikum fyrir dauða sinn.

Corey var með kærasta sínum Alex Dion í skýli fyrir heimilislausa er hún var handtekin.

Dion kærði hana fyrir líkamsárás á sig fyrr í þessum mánuði og við skýrslutöku staðhæfði hann að hún væri komin níu mánuði á leið.