Vopnasali sem framseldur var frá Kanada til Þýskalands í dag á yfir höfði sér allt að fimmtán ára fangelsi fyrir aðkomu sína að spillingarmáli sem kostnaði væntanlega Helmut Kohl kanslarastólinn á sínum tíma þegar í ljós kom að hann hafði stutt flokk Kohl, kristilega demókrata með fjárframlögum svo árum skipti.

Karlheinz Schreiber, 75 ára, hefur árum saman barist gegn því að vera framseldur til Þýskalands en þangað kom hann í dag og var hann strax settur í varðhald í Augsburg fangelsinu. Hann er ákærður fyrir mútur, fjársvik og skattaundanskot.

Helmut Kohl, kanslari Vestur-Þýskalands og síðar sameinaðs Þýskalands frá 1982 til 1998, var um margt merkilegur stjórnmálamaður og hans verður auðvitað lengi minnst vegna sameiningar ríkjanna. Engu að síður hvarf hann út úr þýskri pólitík næstum ærulaus. Það var vegna þess, að 1999 komst upp um það, að flokkur hans, Kristilegi demókrataflokkurinn, CDU, hefði árum saman tekið við ólöglegum fjárframlögum.

Þegar farið var að rannsaka málið kom í ljós mikill spillingarvefur. Þar komu til dæmis við sögu vopnasalinn Karlheinz Schreiber, franska olíufélagið Elf Aquitaine og hergagnasala til Sádi-Arabíu. Nú, áratug síðar, er unnið að rannsókn þessara mála. Kohl hætti á þingi og í stjórnmálum 2002 og það sama ár varð hann að segja af sér sem heiðursformaður CDU.