Ketamín er aðallega notað við dýralækningar. mbl.is

Gríðarleg aukning hefur verið á neyslu fíkniefna meðal ungmenna í Hong Kong. Nemur aukningin um 57% á undanförnum fjórum árum. Á sama tíma hafa vinsældir svæfingarlyfsins Ketamíns aukist gríðarlega umfram annarra efna og er svo komið að talað er um ketamínfaraldur. Bandaríska fréttastofan CNN greinir frá þessu.

Ástæður mikilla vinsælda ketamíns eru offramboð af lyfinu auk þess sem það er mjög ódýrt miðað við önnur fíkniefni. Eitt gramm af ketamíni selst á þrettán dollara, eða um 1.600 krónur. Skammtinn geta tveir einstaklingar notað til að komast í tveggja klukkustunda vímu, en efnið veldur m.a. ofskynjunum. Til samanburðar má geta þess að gramm af kókaíni kostar 103 dollara, eða um þrettán þúsund krónur.

Vegna þessa ástands hafa lögregluyfirvöld í Hong Kong ráðist til inngöngu á skemmtistaði og félagsmiðstöðvar og handtekið fíkniefnaneytendur. Fjöldi fíkniefnaneytenda var handtekinn í síðasta mánuði og haldið í fimmtán daga.

Þrátt fyrir slíkar aðgerðir þykir ástandið ekkert vera að lagast. Yfirvöld hafa því kallað eftir því að fíkniefnapróf verði gerð á nemendum skóla. Í september næstkomandi munu á þriðja tug skóla framkvæmda prófin í tilraunaskyni. Um verður að ræða þvagprufur, en ketamín mælist í þvagi allt að þrjá daga eftir neyslu.

Hrikalegar eftirverkanir við svæfingu

Á vefsvæði doktor.is segir að Ketamín sé stundum gefið í æð til að fá fram sérstakt svæfingarástand. Galli við lyfið séu hins vegar hrikalegar eftirverkanir eins og rangskynjanir, óþægilegir draumar o.fl. Meginnotagildi lyfsins er við dýralækningar.

Ketamín hefur verið notað í fremur litlum mæli af íslenskum fíkniefnaneytendum, en það er þó þekkt. Oftast er það þurrkað og tekið í nefið í duftformi. Það gengur einnig undir nafninu „Special K“ og er þekkt undir því nafni víða um heim.

Byggingakranar í Hong Kong. Reuters