Töluverð umræða fer nú fram um barnsrán í Kína eftir að kona viðurkenndi í sjónvarpsviðtali að hafa starfað fyrir glæpahring sem rændi börnum og seldi þau innan Kína. Þetta kemur fram á fréttavef CNN.

Sagði hún mesta eftirspurn vera eftir drengjum sem væru seldir á andvirði allt að 1.200 Bandaríkjadollara. Stúlkur séu hins vegar seldar á rúmlega 200 dollara.

Í sjónvarpsviðtali við CNN greinir önnur kona Deng Huidong frá því er Ruicong, níu mánaða gömlum syni hennar, var rænt fyrir rúmu ári.

Huidong segir að drengurinn hafi verið hrifsaður af henni af karlmanni sem teygði sig út úr hvítum sendiferðabíl við heimili hennar. Hún segist hafa elt bílinn hljóðandi og fengið til þess aðstoð vegfaranda á mótorhjóli. Eftirförinni hafi hins vegar lokið er hún leitaði á náðir lögreglu.

„Ég fór inn í fjandans lögreglubílinn en eftir nokkrar sekúndur beygði hann skyndilega inn hliðargötu. Ég spurði hvers vegna en fékk engin svör. Ég grét og spurði en var ekki virt viðlits. Seinna þegar ég spurðist fyrir um málið á lögreglustöðinni var mér sagt að lögreglumaðurinn hefði ekki verið á vakt og það hafi því verið á starfssviði annarra að hafa hendur í hári mannræningjanna. Við erum lögreglunni mjög reið. Syni okkar var rænt og það gerði enginn neitt. Það var eins og sonur okkar skipti minna máli en hundur.”

Fleiri foreldrar taka undir gagnrýni Huidong á lögreglu.

„Það hjálpaði okkur enginn. Lögreglunni fannst þetta ekki mikið mál. Þetta gerðist í nóvember og það var ekki byrjað að rannsaka málið fyrr en í desember,” segir Zhang Chunxiang en syni hennar, sem þá var fjögurra ára,  var rænt fyrir fimm árum.

„Lögreglan sagði að barnið hefði ráfað í burtu. Öll fjölskyldan leitaði að honum fram á kvöld,. Þá fór ég aftur á lögreglustöðin og kraup fyrir framan þá en þeim var alveg sama. Þeir sögðu að barnið hefði ráfað í burtu og að við ættum að leita að honum sjálf.”

Yfirmenn lögreglu í umræddum umdæmum neituðu að tjá sig um málið við fréttamenn CNN en Chen Shiqu, yfirmaður mannráns og mansalsdeildar kínverska öryggismálaráðuneytisins segir lögreglu ekki skylt að hefja rannsókn á barnshvarfi hafi enginn orðið vitni að því er barninu var rænt.