Benjamin Netanyahu, forsætisráðherra Ísraels, hefur lýst því yfir að Ísraelar muni gera líbönsk yfirvöld ábyrg fyrir hugsanlegum árásum Hizbollah samtakanna á Ísraela fái samtökin aðild að nýrri ríkisstjórn landsins. Þetta kemur fram á fréttavef Ha’aretz. „Gangi Hizbollah opinberlega til liðs við líbönsku stjórnina er það alveg á hreinu, hvað okkur varðar, að hún ber ábyrgð á hverri árás, hverri einustu árás, frá yfirráðasvæði sínu á Ísraelsríki," sagði Netanyahu við blaðamenn í morgun. „Hún getur þá ekki falið sig og sagt: 'Þetta var Hizbollah, við stjórnum þeim ekki.'" 

Saad al-Hariri, nýskipaður forsætisráðherra landsins, á nú í viðræðum við forsvarsmenn Hizbollah og samherja þeirra þeirra um hugsanlega aðild þeirra að nýrri stjórn sinni.

Einn ráðherra fráfarandi ríkisstjórnar var þingmaður Hizbollah en kosningar fóru fram í Líbanon í júní. Ísraelar lýstu yfir stríði á hendur Hizbollah árið 2006 eftir að samtökin rændu tveimur ísraelskum hermönnum. 1.200 manns, flestir þeirra óbreyttir borgarar, létu lífið í átökunum í Líbanon og 158 í Ísrael, flestir þeirra hermenn.  

Átökunum lauk með vopnahléssamkomulagi með milligöngu Sameinuðu þjóðanna og er friðargæslulið á vegum stofnunarinnar í suðurhluta Líbanons. Ísraelar saka hins vegar Hizbollah um að undirbúa árásir á Ísrael en samtökin saka Ísraela um að hafa ráðið einn af leiðtogum þeirra Imad Mugniyeh af dögum í Damaskus í Sýrlandi á síðasta ári.