Kennari festir grímu á indverskt skólabarn. Reuters

Tuttugu manns hafa látist úr svínaflensu H1N1 á Indlandi og hefur þúsundum skóla, framhaldsskóla og kvikmyndahúsa verið lokað í stórborginni Mumbai og nágrenni til að sporna við útbreiðslu flensunnar. Gleðiganga samkynhneigðra fer fram á sunnudag og er vonast til að aðsókn verði góð þrátt fyrir ógnir flensunnar.

Tveir hafa látist í Mumbai og um 2.000 manns hafa greinst með vírusinn á Indlandi að sögn heilbrigðisyfirvalda. Stórar samkomur eru nú framundan á Indlandi eins og hindúahátíðin vinsæla Krishna Janmashtmi og svo er indverski fullveldisdagurinn á laugardag. Þúsundir safnast venjulega saman á götum Mumbai á Krishna Janmashtmi hátíðinni þar sem fæðingu guðsins Krishna er fagnað.

Þá er gleðiganga samkynhneigðra á dagskrá á sunnudag þar sem búist er við fjölda manns. „Við ætlum að halda ótrauð áfram og búumst við 1.000 manns, nema fólk verði of hrætt við svínaflensuna,“ sagði Nitin Kirani, ritstjóri fyrsta tímariti samkynhneigðra Bombay Dost.

Yfirvöld í Maharasthrahéraði sem Mumbai tilheyrir, fyrirskipuðu lokun skóla og framhaldsskóla í eina viku frá og með deginum í dag. Þá hefur frumsýningu tveggja nýrra Bollywoodkvikmynda verið frestað eftir að tveimur kvikmyndahúsum borgarinnar var lokað.