Dæmi um burkini.

Franskri konu hefur verið bannað að notast við íslömsk baðföt í sundlaug í Frakklandi. Fötin þykja í senn óviðeigandi og ekki uppfylla skilyrði um hreinlæti sundlaugagesta.

Konan, sem nefnd er Carole í frönskum fjölmiðlum, er 35 ára en hún fór fram á að geta notast við baðföt sem hylja nær allan líkamann. 

Baðfötin eru nefnd „burkini“ en það er samblanda af orðunum bikini og burka, sem er heiti á íslömskum klæðnaði fyrir konur.

Fötin voru keypt í Dubai og samanstanda af höfuðtrefli, kyrtli og buxum þótt nær sé að ræða um alfatnað í þessu samhengi.

Að sögn Daniel Guillaume, framkvæmdastjóra sundlaugar í Emerainville, einu úthverfa Parísar, var konunni bent á að bannað væri að fara í laugina í svo miklum klæðnaði.

Málið hefur vakið umræðu í Frakklandi en stjórn Nicolas Sarkozy forseta íhugar að banna íslamskan klæðnað sem talin er bera undirgefni kvenna vitni, samkvæmt skilgreiningu hennar.

Sarkozy íhugar umdeilt bann

Sagði forsetinn ekki koma til greina að í Frakklandi væri að finna konur sem væru fangar á bak við alklæðnað þar sem net hylur andlit. Frakkar samþykktu ekki að í samfélaginu væru konur sem gætu ekki tekið þátt í félagslífi. Slíkur klæðnaður svipti konum einkennum sínum.

André Gérin, þingmaður úr röðum kommúnista, fer fyrir nefnd sem er falið að meta hvort banna eigi búrkuna en hann lét þau orð falla í gær að hún væri ögrun sem ætti að banna.

Carole snerist til íslamskrar trúar þegar hún var 17 ára og vonaðist til að fötin myndu gera henni kleift að njóta sundlauga.

Hún segist upphaflega hafa fengið að synda í fötunum í sundlauginni í Emerainville en síðan verið meinuð aðganga.