Ekki er vitað hvort þetta eru mennirnir sem hafa verið handteknir. Reuters

Tveir menn koma fyrir breska dómstóla á morgun eftir að hafa verið ákærðir fyrir aðild að stærsta skartgriparáni Bretlands, en tjónið vegna þess er talið nema 40 milljónum punda eða rúmlega átta og hálfum milljarði íslenskra króna.

Mennirnir eru ákærðir fyrir samsæri ásamt fleirum um að ræna Graff skartgripaverslunina í London en ránið var gert um hábjartan dag fyrr í þessum mánuði. Mennirnir eru 24 og 26 ára og hafa einnig verið ákærðir fyrir að brjóta gegn vopnalögum.

Lögreglan hefur handtekið þrjá menn á liðnum tveimur dögum vegna ránsins sem er sagt hafa verið vel skipulagt og eru fleiri taldir eiga hlut að máli. Fimmtugur maður var einnig handtekinn í síðustu viku en honum var sleppt.

Breska lögreglan hefur neitað að gefa nánari upplýsingar um handtökurnar og neitar að segja hvort mennirnir sem voru ákærðir voru þeir sem náðust á eftirlitsmyndavélar daginn sem ránið var framið.

Lögreglan hefur einnig neitað að gefa upp hvort eitthvað af góssinu, 43 hringir, armbönd, hálsmen og úr hafi fundist. Fundarlaun upp á eina milljón punda eru í boði fyrir þá sem finna mennina sem stóðu að ráninu á Nýja Bond stræti.

Ræningjarnir komu í búðina í svörtum leigubíl, klæddir í grá jakkaföt og hvítar skyrtur og töluðu með Lundúnahreim. Þeir löbbuðu inn í búðina um hábjartan dag og ógnuðu starfsfólki með byssum. Þegar þeir yfirgáfu búðina drógu þeir starfsstúlku með sér og skutu varnaðarskotum fyrir utan. Þeir skildu konuna eftir og brunuðu á brott í bláum BMW. Enginn særðist.

Stjörnur á borð við Paris Hilton, Kylie Minogue, Naomi Campbell, Oprah Winfrey og Viktoríu Beckham eru meðal gesta Graff-skartgripabúðarinnar.