Natascha Kampusch. AP

Þremur árum eftir að austuríska stúlkan Natascha Kampusch slapp úr haldi manns sem lokaði hana inn í átta og hálft ár, segist hún ekki upplifa sig sem frjálsa manneskju.

Kampusch slapp úr haldi 23. ágúst 2006. Maður að nafni Wolfgang Priklopil, rændi henni árið 1998 þegar hún var á leið í skólann. Hún var þá 10 ára gömul. Þó að þrjú ár séu liðin frá því hún slapp úr haldi er enn verið að spyrja spurning um málið. Nefnd sem skipuð var til að rannsaka vinnubrögð lögreglunnar í málinu, hefur gefið til kynna að ræningi hafi ekki verið einn að verki, en Kampusch hefur vísað því á bug og sagt þessar fullyrðingar fáránlegar.

Kampusch kvartar undan athygli sem mál hennar hefur vakið. Hún segir í samtali við austurríska og þýsk blöð að hún haldi sig mikið til hlés og fari sjaldan út úr íbúð sinni. Hún noti tímann í að læra, teikna og taka myndir.

"Ég þjáist af kvíðaköstum og fer sjaldan út," sagði Kampusch í samtali við Süddeutsche Zeitung.

"Lífið er ekki eins gott og ég ímyndaði mér að það yrði," sagði hún í samtali við austurríska dagblaðið Krone.