Forsætisráðherra Bretlands, Gordon Brown, er gagnrýndur harðlega fyrir að tjá sig um sigur Englendinga í Ashes krikket keppninni en þegja þunnu hljóði hvað varðar lausn Abdulbaset Ali Mohmed al Megrahi, sem var látinn laus úr fangelsi í síðustu viku en hann hafði verið dæmdur í lífstíðarfangelsi fyrir hlut sinn í Lockerbie sprengjutilræðinu.

Nick Clegg, leiðtogi frjálslyndra demókrata í Bretlandi segir að það sé fáránlegt og mjög slæmt að forsætisráðherrann tjái sig ekki um lausn fangans, að því er fram kemur á vef breska dagblaðsins Telegraph í dag.

Breska stjórnin hefur vísað algerlega á bug fullyrðingum sonar Muammars Gaddafis Líbýuleiðtoga, Seif al-Islams, um að hún hafi beitt skosku heimastjórnina þrýstingi til að hún leysti al-Megrahi úr haldi.

Um helgina kom fram að í bréfi frá Gordon Brown til Gaddafis sé rifjað upp að leiðtogarnir hafi hist í tengslum við G-8 fund á Ítalíu fyrir hálfum öðrum mánuði. Brown hafi þá sagt að ef Skotar létu manninn lausan væri rétt að efna ekki til „mikils fagnaðar“ í Líbýu við komu mannsins vegna þess að það myndi koma illa við aðstandendur fórnarlamba Lockerbie-tilræðisins. Áður hefur Brown sagt að lítillega hafi verið minnst á fangann en hann virðist þegar vera byrjaður að setja Gaddafi skilyrði fyrir sex vikum.

Talsmaður Brown sagði í samtali við Telegraph að það hafi verið ákvörðun skosku heimastjórnarinnar að láta al-Megrahi úr haldi.

Á sama tíma hefur Brown verið tilbúinn að tjá sig um sigur Englands á Ashes, með því hefur hann uppskorið gagnrýnisraddir sem segja að hann sé meira en til í að tjá sig um léttúðug mál en síður um lausn manns sem myrti 270 manns, samkvæmt frétt Telegraph.