VALENTIN FLAURAUD

Dauðsföll í Brasilíu sem rakin eru til H1N1 inflúensunnar, eru nú orðin 557. Hvergi í heiminum hafa fleiri látist af völdum H1N1. Í Bandaríkjunum höfðu síðastliðinn fimmtudag verið tilkynnt 522 dauðsföll af völdum inflúensunnar.

Heilbrigðisráðherra Brasilíu segir að þótt útbreiðsla veirunnar virðist í rénun, hafi stjórnvöld ákveðið að verja einum milljarði dollara í kaup á nýju bóluefni gegn flensunni, Tamiflu flensulyfi, búnaði fyrir sjúkrahús og búnaði til greiningar á veirunni.

Ráðherrann segir að 557 dauðsföll séu vissulega mikið en sem hlutfall af 190 milljóna íbúa fjölda landsins sé Brasilía í sjöunda sæti í heiminum yfir fjölda látinna miðað við höfðatölu. Dánartíðnin sé hærri í Argentínu, Chile, Kosta Ríka, Úrúgvæ, Ástralíu og Paragvæ ef miðað sé við höfðatölu.

Bandaríkin lenda í 13. sæti á lista yfir þau ríki þar sem flest dauðsföll hafa orðið miðað við höfðatölu, af völdum H1N1 inflúensunnar.

Ameríka hefur orðið langverst úti af völdum H1N1 inflúensunnar en að sögn Alþjóðaheilbrigðismálastofnunarinnar, WHO, eru 9 af hverjum tíu tilfellum inflúensu og dauðsföll af hennar völdum í þessum heimshluta.

Á Íslandi voru frá 29. júní – 23. ágúst skráð samtals 684 tilfelli með inflúensulík einkenni eða staðfesta inflúensu A í Sögu sjúkraskrá, þar af eru 305 karlar og 379 konur. Hröð aukning tilfella hefur átt sér stað á síðastliðnum vikum og telur sóttvarnalæknir líklegt að fjöldi tilfella fari vaxandi á næstunni.