SH-60B herþyrla líkt og sú sem skotið var á í gærmorgun á Aden flóa.

Sómalskir sjóræningjar skutu á bandaríska herþyrlu á eftirlitsflugi í Aden flóa í gærmorgun. Sjóræningjarnir skutu frá Taívönsku fiskiskipi sem þeir náðu á sitt vald í byrjun apríl. Að minnsta kosti 30 manna áhöfn er um borð í fiskiskipinu en sjóræningjar hafa notað skipið sem bækistöð sína á flóanum.

Áhöfn bandarísku þyrlunnar sakaði ekki. Þyrlan var að ljúka eftirlitsflugi og var á leið um borð í herskipið USS Chancellorsville þegar skothríðin hófst. Áhöfnin varð þó ekki vör við skothríð sjóræningjanna en myndbandsupptökur úr þyrlunni staðfesta árás sjóræningjanna.

Það sem af er þessu ári hafa sómalskir sjóræningjar náð 29 skipum á sitt vald á Aden flóa en sjóránstilraunir á flóanum eru orðnar 114 á árinu.

Tugur herskipa er nú á Aden flóa til að reyna að stemma stigu við tíðum sjóránum Sómala þar.

Taívanska fiskiskipið Win Far sem sómalskir sjóræningjar rændu í apríl og nota nú sem bækistöð á Aden flóa.