Mahmoud Ahmadinejad við föstudagsbænir í dag Reuters

Mahmoud Ahmadinejad Íransforseti hvatti til þess í morgun að leiðtogar stjórnarandstöðunnar í landinu verði sóttir til saka vegna fjöldamótmæla í kjölfar forsetakosninganna í landinu í júní. Sagði hann að þeir sem þegar hafa verið ákærðir vegna mótmælanna eigi ekki einir að bera sökina vegna þeirra.

„Það þarf að taka alvarlega á þeim leiðtogum og öflum sem skipulögðu og hvöttu til uppþotanna og framkvæmdu áætlanir óvinarins. Það verður að taka á þeim af fullri alvöru,” sagði fosetinn er hann ávarpaði mannfjölda við föstudagsbænir í Teheran í dag.

Þá sagði hann að sýna verði þeim sem þegar hafa verið ákærðir íslamska miskunn enda hafi þeir verið blekktir til að taka þátt í uppþotunum. „Það ber að sýna þeim sem voru blekktir og gerðir að verkfærum íslamska miskunn. Það er ekki rétt að veita hinum raunverulegu áhrifavöldum friðhelgi og vernd og refsa þeim sem voru blekktir og notaðir.”

Ahmadinejad nefndi engin nöfn í ræðu sinni en áður hafa samherjar hans hvatt til þess að nefnt forsetaframbjóðendurnir Mir Hossein Mousavi og Mahdi Karroubi og Mohammad Khatami, fyrrum forseti landsins, verði ákærðir vegna mótmælanna.

Í ræðunni viðurkenndi forsetinn í fyrsta skipti opinberlega að mótmælendur hefu verið beittir ofbeldi í fangelsum eftir að þeir voru handteknir en sagði ábyrgðina ekki vera ráðamanna í Íran heldur stjórnarandstöðunnar og óvina ríkisins.

„Þessar illu gjörðir, sem framkvæmdar voru í fangelsunum, voru þáttur í áætlun óvinanna,” sagði hann. Yfirvöld öryggismála, hers og leyniþjónustan bera ekki ábyrgð á þessum skammarlegu atburðum.”