Dómari í Hollandi hefur falið barnaverndaryfirvöldum forræði þrettán ára stúlku, sem hugðist freista þess að verða yngsti einstaklingurinn til að sigla ein umhverfis jörðina. Þetta kemur fram á fréttavef BBC. 

Gildir úrskurður dómarans næstu sex mánuði en samkvæmt honum geta  foreldrar stúlkunnar Laura Dekker ekki tekið stórar ákvarðanir fyrir hana á þeim tíma. Hún mun þó áfram búa hjá föður sínum 

Í úrskurðinum er jafnframt kveðið á um að geðlæknir meti hæfni stúlkunnar til að takast slíka ferð á hendur.

Þá lýsir dómarinn áhyggjum af því að slík ferð geti ógnað andlegri og líkamlegri heilsu stúkunnar. Foreldrar stúlkunnar styðja áform hennar en málið komst til kasta yfirvalda er faðir hennar sótti um tveggja ára leyfi fyrir hana úr skóla. Þeirri umsókn hans var hafnað.  

„Við erum að tala um þrettán ára gamalt barn,” sagði Caroline Vink, annar æðsti yfirmaður barnaverndarmála í Hollandi. „Það má setja spurningamerki við það hvort hún sé fær um að taka slíka ákvörðun og það hvort ákvarðanir foreldra hennar séu teknar með hagsmuni hennar í huga.” 

Foreldrar Lauru segja hana fædda um borð í snekkju úti fyrir Nýja Sjálandi er þau voru stödd þar á sjö ára siglingu sinni um heiminn. Hún eignaðist sína eigin skútu þegar hún var sex ára og hefur siglt ein frá því hún var tíu ára.

„Frá því ég var tíu ára hef ég vitað að ég vildi sigla umhverfi hnöttinn,” sagði hún í sjónvarpsviðtali áður en úrskurður dómarans lá fyrir. „Ég vil bara læra um heiminn og vera frjáls.”

Fyrr í vikunni varð sautján ára breskur piltur yngsti einstaklingurinn til að sigla einn í kring um hnöttinn. Ferð hans tók níu mánuði.