Nes kirkja í Romerike

Mistök útfararstofu í Romerike í Noregi urðu til þess að lík var kvatt í vitlausri jarðarför og viku fyrr en útför þess átti að fara fram. Starfsmenn útfararstofu sem áttu að flytja kistu til kirkjunnar í Nes slepptu því að lesa á merkimiðann á kistunni og tóku ranga kistu.

Þegar kistan var sótt sáu mennirnir aðeins eina kistu í líkstofunni og tóku hana án þess að lesa á merkimiðann. Rétta kistan sem átti að grafa þennan dag var falin á bakvið hengi. Mistökin uppgötvuðust þegar átti svo að sækja kistuna sem þegar var búið að jarða.

Vefurinn adressa.no greinir frá þessari pínlegu uppákomu. Að sögn yfirmanns útfararstofunnar Eidsvoll Begravelsesbyrå AS er starfsmaðurinn sem gerði þessi mistök ákaflega leiður yfir þeim. Aðstandendum hinna látnu var þegar gert viðvart um leið og mistökin uppgötvuðust.

Aðstandendurnir urðu sammála um að setja myndir af hinum látnu, blóm og kerti við grafirnar sem þeir áttu að hvíla í. Kistan sem hafði verið jörðuð í rangri gröf var síðan flutt í sína réttu gröf og jarðsett á ný. 

Sóknarpresturinn sagðist aldrei hafa lent í nokkru þessu líku áður. Hann sagði að þetta hafi verið erfitt fyrir syrgjendurna en þeir hafi sýnt kjark og komist í gegnum þessa erfiðu reynslu.