Segja má að gjá hafi myndast milli stjórnvalda og íbúa á Samóa vegna þess að breyta á frá hægriumferð yfir í vinstriumferð um næstu helgi. Þúsundir manna hafa skrifað undir áskorun um að hætt verði við þetta og málið hefur einnig komið til kasta hæstaréttar eyjanna. 

Það tók hæstaréttardómarann Vui Clarence Nelson nærri fjórar stundir í morgun að lesa upp dóm í máli sem samtökin Fólk gegn vinstriumferð höfðaði gegn stjórnvöldum og taldi breytinguna brjóta gegn stjórnarskrárbundnum rétti íbúa til að lifa þar sem breytingin muni leiða til fleiri umferðarslysa og brjóta einnig gegn réttindum eigenda bíla þar sem stýrið er vinstra megin. 

Dómarinn taldi hins vegar ekki sannað að vinstriumferð leiddi til fleiri slysa.

Aumua Ming Leung Wai, ríkissaksóknari, fagnaði úrskurði dómarans og sagði að allir yrðu að vinna saman að því að tryggja að breytingin gangi vel fyrir sig. Hann gagnrýndi jafnframt stjórnvöld fyrir að taka þessa ákvörðun án þess að ráðfæra sig við þjóðina áður. 

Þetta mun vera fyrsta breytingin af þessu tagi í heiminum frá því Nígería, Gana og Jemen tóku upp hægriumferð á áttunda áratug síðustu aldar. Tuilaepa Sailele Malielegaoi, forsætisráðherra Samóa, rökstuddi ákvörðun um að taka upp vinstriumferð með því, að þá myndu sömu reglur gilda á Samóa og í Ástralíu og á Nýja-Sjálandi þar sem um 170 þúsund Samóar búa.

Um 180 þúsund manns búa á Samóa og hefur sjötti hluti þeirra tekið þátt í undirskriftasöfnun gegn breytingunni.  

Þeir sem reka áætlunarbíla á eyjunum eru afar óánægðir með breytinguna því setja þarf nýjar dyr á rúturnar svo farþegar þurfi ekki að stíga út úr þeim á miðjum vegi. Þá hafa íbúar í að minnsta kosti einu þorpi hótað að stöðva alla umferð ef bílar aka þar á vinstri akrein.  Frekari mótmælaaðgerðir eru fyrirhugaðar um helgina.