Arnold Schwarzenegger, ríkisstjóri Kaliforníu, heimsótti í dag hættusvæðin í útjaðri Los Angeles en skógareldar ógna þar allt að tíu þúsund heimilum. Þá er talið að tvö til þrjú þúsund aðrar byggingar kunni að vera í hættu. Rúmlega þúsund heimili hafa þegar verið rýmd vegna eldanna og hefur Schwarzenegger lýst yfir neyðarástandi í Los Angeles og Monterey.

Eldarnir hafa logað í útjaðri Los Angeles síðan á föstudag og hefur um 140 ferkílómetra svæði brunnið. Eldarnir mögnuðust mjög í dag en mikill þurrkur hefur verið á svæðinu að undanförnu.

Rúmlega 2.000 slökkviliðsmenn berjast við skógareldana. Að auki er notuð DC-10 þota til að dreifa vatni yfir eldana.

„Kalifornía hefur yfir að ráða einhverjum bestu og hugrökkustu slökkviliðsmönnum sem hugsast getur og þeir gæta öryggis íbúanna,“ sagði Schwarzenegger.

Þrír slösuðust í skógareldunum í gær og þrjú hús hafa þegar brunnið til ösku. Enginn hefur látist af völdum eldanna svo vitað sé. Eldarnir eru illviðráðanlegir og hefur aðeins tekist að slökkva um tuttugasta hluta þeirra. Landfræðilegar aðstæður torvelda mjög slökkvistarfið en eldarnir loga í fjallshlíðum. Yfirvöld segja mikla hættu á að eldarnir breiðist enn frekar út ef hvessir í veðri.