Hvíta húsið gaf lítið fyrir hörð mótmæli Dick Cheney, fyrrum varaforseta Bandaríkjanna, vegna rannsóknar á meintum misþyrmingum leyniþjónustunnar CIA á föngum og dró í efa dómgreind hans á sviði utanríkismála.

„Þetta er sami söngurinn og við höfum heyrt nánast frá byrjun stjórnarinnar,“ sagði talsmaður Hvíta hússins, Robert Gibbs, eftir að Cheney gerði lítið úr rannsókninni og sagði hana vera rekna áfram af pólitískum hvötum og skaðlega þjóðarhagsmunum.

Gibbs sagði að Cheney hefði greinilega margar staðreyndir ekki á hreinu og lagði áherslu á orð Repúblikanans John McCain sem sagði yfirheyrsluaðferðir CIA vera pyntingar.

„Mig langar að bæta þessu við, ég er ekki viss um að spár Dick Cheneys í utanríkismálum hafi borið mikinn ávöxt síðustu átta árin, þær hafa hvorki verið jákvæðar né réttar, svo vítt sem ég veit,“ sagði hann.

Cheney sagði í viðtali við Fox News Channel síðastliðinn sunnudag að rannsóknin væri fáránlegt pólitískt bragð sem gæti skaðað þjóðarhagsmuni með því að fylla starfsmenn CIA ótta um mögulegar, löglegar hefndaraðgerðir.

Eric Holder, ríkissaksóknari, útnefndi í síðustu viku sérstakan rannsóknarmann sem á að athuga hvort þörf er á fullri rannsókn á yfirheyrslum CIA á meintum hryðjuverkamönnum.

Rannsóknin mun ná til útsendara leyniþjónustunnar erlendis sem grunaðir eru um að hafa farið yfir mörkin sem tilgreind voru í minnisblaði gerðu á tímum Bush stjórnarinnar eftir hryðjuverkaárásirnar 11. september.

Barack Obama, forseti Bandaríkjanna, hefur útilokað að þeir útsendarar leyniþjónustunnar  sem fóru í góðri trú eftir línunum sem þeim voru lagðar í minnisblaðinu verði saksóttir.