Olíufyrirtækið BP Plc greindi frá því í gær að það hefði fundið mikið magn olíu á botni Mexíkóflóa. Talið er allt að vinna megi allt að milljarð olíutunna þaðan. Þetta kemur  fram á fréttavef Reuters.

Fram kemur í yfirlýsingu fyrirtækisins að olían hafi fundist við borun einnar dýpstu olíuborholu fyrirtækisins til þessa á Tiber-vinnslusvæðinu í Keathley gljúfrinu.

„Ef við gerum ráð fyrir að 4 milljarðar tunna af olíu séu á svæðinu og að hægt sé að vinna 35% þeirra þá eru það um 868 milljónir tunna sem er um 4,8% af 18,14% milljarða tryggðum olíubirgðum fyrirtækisins,” segir sérfræðingurinn Aymeric De-Villaret.

Annar sérfræðingur Iain Armstrong, segir að olíufundurinn geti haft langtímaáhrif á þróun olíuverðs á heimsmarkaði. „Þetta mun draga úr áhyggjum af því að hámarki sé náð í olíuvinnslu þar sem það sýnir að það er enn líf í þessum þróuðu svæðum,” segir hann.  

Hann varar þó við því að áratugur muni sennilega líða þar til vinnsla á svæðinu verður komin almennilega í gang.BP er stærsta olíufyrirtæki Bandaríkjanna og stærsti handhafi olíuvinnsluréttinda á Mexíkóflóa.

Aðrir helstu handhafar olíuvinnsluréttinda þar eru brasilíska ríkisfyrirtækið Petrobras sem er handhafi um 20% réttinda þar og bandaríska fyrirtækið ConocoPhillips sem er handhafi um 18% réttindanna.