Reuters

Utanríkisráðherra Írlands, Micheal Martin, segir að efitt verkefni bíði ríkisstjórnar landsins en í næsta mánuði fer fram þjóðaratkvæðagreiðsla um Lissabon sáttmálann þar í landi. Samkvæmt nýrri skoðanakönnun hefur dregið úr stuðningi landsmanna við hann en sáttmálinn var felldur í þjóðaratkvæðagreiðslu á Írlandi í fyrra.

Samkvæmt skoðanakönnun Irish Times/TNS hefur stuðningur við sáttmálann minnkað um 8% frá því í síðustu könnun í maí. Styðja nú 46% Íra sáttmálann en 29% eru á móti. 25% hafa ekki enn gert upp hug sinn og er það 7% aukning milli skoðanakannanna. Þjóðaratkvæðagreiðslan fer fram þann 2. október nk.

Martin sagði í viðtali við írska ríkissjónvarpið í morgun að ljóst sé að mjótt verður á munum en hann telji að fleiri segi já en nei. 

Eftir að kjósendur í Frakklandi og Hollandi höfnuðu stjórnarskrársáttmála Evrópusambandsins í þjóðaratkvæðagreiðslu árið 2005 var samið um nýjan sáttmála, Lissabon-sáttmálann.

Það er í valdi aðildarríkjanna að ákveða hvernig skal staðfesta eða hafna sáttmálum og aðeins á Írlandi er krafa, byggð á dómi Hæstaréttar Írlands, um að sáttmálar séu bornir undir þjóðaratkvæði.

Írar höfnuðu Lissabon-sáttmálanum í júní í fyrra er tæplega 54% þátttakenda sögðu nei. Í lok síðasta árs samdi írska ríkisstjórnin um tiltekin atriði sem þau telja að hafi átt stóran þátt í „nei-inu“, m.a. munu aðildarríki áfram tilefna einn framkvæmdastjóra í framkvæmdastjórnina og því var lýst yfir að ESB færi ekki að skipta sér af „siðferðilegum“ málum, s.s. banni við fóstureyðingum og hjónaböndum samkynhneigðra.