Gordon Brown, forsætisráðherra Bretlands, heimsótti skóla í Hackney í London í morgun. Reuters

Skrifstofa Gordons Brown, forsætisráðherra Bretlands, hefur vísað því á bug að hann hafi tekið U-beygju í afstöðu sinni til beiðni aðstandenda fórnarlamba Írska lýðveldishersins (IRA) um að bresk yfirvöld styðji kröfu þeirra um skaðabættur frá yfirvöldum í Líbýu. Þetta kemur fram á fréttavef BBC. 

Brown tilkynnti í gær að hann hygðist stofna nefnd til að aðstoða aðstandendur fórnarlambanna en fyrir ári skrifaði hann forsvarsmönnum þeirra bréf þar sem hann sagðist ekki telja viðeigandi að bresk yfirvöld þrýstu á yfirvöld í Líbýu í málinu. 

Talsmaður Brown sagði í dag að hann hefði verið fullkomlega samkvæmur sjálfum sér í málinu enda væri hlutverk nefndarinnar að veita aðstoð en ekki að stýra samningaviðræðum. Þá sagði hann ákvörðun um stofnun nefndarinnar vera nýlega en vildi ekki gefa upp hvort hún hefði verið tekin áður en bréfi Brown, til aðstandendanna, var lekið í fjölmiðla. 

 Ed Balls, menntamálaráðherra bresku stjórnarinnar, tók í sama streng í sjónvarpsviðtali í morgun. „Þetta er ekki U-beygja því eins og ég skil það þá sagði Gordon Brown það sama í gærkvöldi og hann hafði áður sagt við fjölskyldurnar,” sagði hann.

Þá sagði hann ekki mögulegt að breska stjórnin kæmi með virkum hætti að málinu þar sem hún hefði þegar samið um það við yfirvöld í Líbýu að láta það sem gerst hafi í fortíðinni kyrrt liggja og horfa fram á veginn. 

Balls sagði einnig að bresk yfirvöld hefðu reynt að sækja skaðabætur til Líbýumanna árið 2004, bæði fyrir aðstandendur fórnarlamba tilræða IRA og Lockerbie-tilræðisins. Líbýumenn útveguðu IRA sprengjuefni og hafa fallist á að greiða þremur Bandaríkjamönnum skaðabætur vegna þess.

„Það gekk ekki og það var mat ríkisstjórnarinnar þá, og er enn, að slíkt myndi ekki skila árangri og einungis spilla samskiptum sem snúast ekki bara um viðskipti og olíu heldur einnig samvinnu sem miðar að því að tryggja öryggi Breta gagnvart alþjóðlegri hryðjuverkastarfsemi," segir Balls.