Réttarhöld hófust í morgun í Frakklandi yfir pari sem er ákært fyrir að myrða börnin sín árið 2005. Parið á yfir höfði sér lífstíðarfangelsi en þau töldu að það yrði auðveldara fyrir þau að komast út úr miklum skuldum án barnanna. Börnin tvö létust eftir að hafa borðað eitrað cannelloni á heimili sínu í borginni Marseille.

Marie-Helene Martinez og eiginmaður hennar, Jean-Paul Steijns, eru ákærð fyrir að hafa myrt Melissu, átta ára og Jason, sjö ára. Auk skuldafensins óttuðust þau að missa forræðið yfir börnunum til blóðföður þeirra, Antoine Correlejo, fyrri eiginmanns Martinez.

Þegar Martinez, 29 ára, gekk inn í réttarsalinn í morgun brást fjölskylda  blóðföðurins illa við og þurfti lögregla að skakka leikinn. Martinez neitar að hafa myrt börnin en Steijns hefur játað.  

Martinez ítrekaði fyrri orð sín í réttarsalnum í dag og sagðist hafa elskað börnin og hún hefði aldrei getað framið morðin.

Þegar lögregla kom í íbúð hjónanna í Marseille í kjölfar láts barnanna þá fann hún rotnað lík nýbura á svölunum. Hjónin eru hins vegar ekki ákærð fyrir morðið á því barni nú en ekki hefur verið hægt að úrskurða um dánarorsök barnsins vegna þess hve illa rotið líkið var.

Steijns játaði við réttarhöldin í morgun að hafa tekið þátt í morðunum en tók fram að hann hafi ekki verið einn að verki heldur hafi eiginkonan einnig myrt börnin.

„Ég er meðvitaður um að ég tók þátt í skelfilegu athæfi sem kostaði þrjú saklaus börn lífið," sagði hann og bætti við: „Ég hefði átt að koma í veg fyrir að hún fremdi glæpinn."

Steijns heldur því fram að kona hans hafi neytt hann til þess að myrða börnin þegar útlit var fyrir að þau myndu missa íbúðina eftir að hafa verið í vanskilum með greiðslu á leigunni í nokkra mánuði.

Kvöldið 18. september 2005 kvörtuðu þau Melissa og Jason yfir því að maturinn sem móðir þeirra og fósturfaðir höfðu borið fram, kjötfyllt cannelloni, væri biturt á bragðið og fóru í rúmið án þess að klára af diskum sínum, samkvæmt frétt franska dagblaðsins Le Parisien.

Dóu þau um nóttina og fundust lík þeirra, falin í skotti bifreiðar mánuði síðar, að sögn Steijns.

„Ég dó ásamt Melissu og Jason þessa nótt," sagði  Steijns í réttarsalnum. „Það geta engin orð lýst tilfinningum mínum."

Amma barnanna í föðurætt brotnaði saman við réttarhöldin í morgun og sagði við fréttamenn að hún vonaðist til þess að hjónin yrðu dæmd í lífstíðarfangelsi. Úrskurður dómara verður væntanlega kveðinn upp á föstudag.

Lögfræðingur Steijns, Fabien Perez, sagði í viðtali við Le Parisien að Martinez hafi stjórnað skjólstæðing sínum og hún hefði sagt honum að eina leiðin fyrir þau til þess að hefja nýtt líf væri að fórna börnunum. Aftur á móti heldur lögfræðingur hennar því fram að Steijns að hann hafi staðið á bak við morðin.