Ísraelska landnemabyggðin Har Gilo gnæfir yfir þorp Palestínumanna á Vesturbakkanum Reuters

Byggingarleyfi sem Ehud Barak varnarmálaráðherra Ísraels, veitti vegna bygginga í landnemabyggðum gyðinga á Vesturbakkanum í gær eru í raun leyfi sem þegar höfðu verið samþykkt, samkvæmt heimildum ísraelska blaðsins Ha’aretz.

Ýmsar ástæður hafa hins vegar verið fyrir því að leyfin hafa ekki verið formlega staðfest fyrr en nú. Á nokkrum þeirra byggingasvæða sem um ræðir hefur undirbúningur framkvæmda þegar verið hafinn.

Samkvæmt heimildum Ha’aretz er það skilyrði sett fyrir leyfisveitingunum nú að framkvæmdir við byggingarnar hefjist innan tveggja mánaða. Að öðrum kosti falla þau úr gildi.

Barak veitti formlega 455 byggingarleyfi í gær eftir að  ríkisstjórn landsins samþykkti tillögu Benjamin Netanyahu forsætisráðherra um að þær yrðu samþykktar á sunnudag.

Um er að ræða 149 leyfi til bygginga íbúða í Har Gilo, 12 í Etzion í Alon Shvut, 84 í Modi'in Ilit, 76 í Agan Ha'ayalot í Givat Ze'ev, 89 í Ma'aleh Adumim og 25 í Kedar. Flestar eru eru þessar landnemabyggðir í nágrenni Jerúsalem en einnig var veitt leyfi til byggingar 20 íbúða í Maskiot í Jórdanárdalnum.

Einnig veitti Barak leyfi fyrir byggingu skemmtigarðs í Ariel og skóla í Har Adar en Ísraelar hafa sagt umrædd byggingarleyfi nauðsynleg til að tryggja eðlilega þróun landnemabyggðanna.  

Palestínumenn hafa brugðist ókvæða við fréttum af því að umræddar framkvæmdir hafi verið samþykktar og segja það draga mjög úr líkum á því að friðarviðræður Ísraela og Palestínumanna hefjist á ný. 

Bandaríkjastjórn er hins vegar sögð hafa fallið frá andstöðu við framkvæmdirnar gegn því að ríkisstjórn Ísraels lýsi því yfir innan tíðar að frekari framkvæmdir í gyðingabyggðum á Vesturbakkanum hafi verið fryst.