Ættingjar Khalid Sheikh Mohammed, sem talinn er hafa verið einn af skipuleggjendum hryðjuverkaárásanna í Bandaríkjunum árið 2001, hafa nú birt myndir af honum þar sem hann er í haldi í Guantanamo-fangabúðum Bandaríkjahers. Þetta kemur fram á fréttavef Sky.

Ættingjar hans hafa áður verið sakaðir um að styðja hryðjuverkastarfsemi og hafa sérfræðingar varað við því að svo virðist sem tilgangur myndbirtingarinnar sé að hvetja til hryðjuverkaárása gegn Bandaríkjamönnum.

Mohammed, sem hefur sjálfur lýst því yfir að hann hafi skipulagt árásirnar, var handsamaður árið 2003 og síðan þá hafa ekki birst nýjár myndir af honum fyrr en nú.

Myndirnar sem um ræðir eru komnar frá Alþjóða Rauða krossinum sem tekur myndir af föngum og sendir staðfest afrit þeirra til fjölskyldna þeirra. Er það þáttur í eftirliti stofnunarinnar með meðferð fanga.

Stofnunin fékk fyrst að mynda fanga á Guantanamo í febrúar á þessu ári og síðan þá hafa 107 fangar þar verið myndaðir á vegum stofnunarinnar.Talsmaður stofnunarinnar Bernard Barrett segir myndirnar ekki hafa verið ætlaðar til opinberrar birtingar.