Fundur Alþjóðakjarnorkumálastofnunarinnar IAEA hefur staðið yfir í þessari viku í Vínarborg. Reuters

Philip Crowley, talsmaður bandaríska utanríkisráðunneytisins segir Bandaríkjastjórn ekki hrifna af tillögum Írana um til að draga úr vígbúnaði í heiminum sem kynntar voru fulltrúum stjórnarinnar á miðvikudag. Þetta kemur fram á fréttavef BBC.

Crowley segir Írana ekki hafa lagt fram neinar upplýsingar um stöðu kjarnorkuáætlanir sínar með tillögunum.

„það sem veldur okkur áhyggjum er það að í svari þeirra er ekki fjallað um það sem skiptir mestu máli og er í raun ástæða þess að alþjóðasamfélagið hefur áhyggjur. Þá á ég við fyrirætlanir þeirra í kjarnorkumálum," segir Crowley. 

„Ein af spurningunum sem svara þarf er raunverulegur áhugi Írana á samvinnu, annað hvort við Bandaríkin eða alþjóðasamfélagið. Þá er kjarnorkuáætlun þeirra auðvitað mikið áhyggjuefni." 

Í gær sagði  Mojtaba Samareh, náinn samstarfsmaður Íransforseta, í viðtali við Washington Post að ekki komi til greina að Íranar falli frá kjarnorkuáætlun sinni. Hann sé hins vegar tilbúinn til að vinna með alþjóðasamfélaginu að eyðingu kjarnorkuvopna í heiminum.

Sergei Lavrov, utanríkisráðherra Rússlans, segir tillögur Írana hins vegar vera efni til að vinna með. „Á grundvelli skjótrar yfirferðar á skjölum Írana er það tilfinning mín að það megi nýta eitthvað af þeim," segir hann. „Mikilvægast er þó að Íranar eru reiðubúnir til umfangsmikilla viðræðna um það hvernig þeir geti komið með jákvæðum hætti að ástandi mála í Írak."

 Bridget Kendall, fréttaskýrandi BBC í Moskvu, segir ljóst af viðbrögðum mannanna að bilið á milli Vesturveldanna annars vegar og Rússlands hins vegar gagnvart Íran haldi áfram að breikka.

Tillögur Írana hafa ekki verið birtar opinberlega en á miðvikudag staðhæfði Glyn Davies, fulltrúi Bandaríkjanna hjá Alþjóðakjarnorkumálastofnuninni að hugsanlegt sé að Íranar eigi nú þegar nóg magn af lítt auðguðu úrani til að byggja kjarnorkusprengju. Þó þyrfti að auðga úranið meira áður en það væri nothæft í slíka sprengju.