Líkurnar á því að Vladímír Pútín, sem nú gegnir embætti forsætisráðherra Rússlands en var áður forseti í átta ár, taki aftur við forsetaembættinu þykja hafa aukist til muna. Hann ávarpaði í gær hóp erlendra og rússneskra háskólamanna og fréttamanna í Moskvu. Sagði Pútín að hann og Dímítrí Medvedev, núverandi forseti, myndu taka sameiginlega ákvörðun þegar þar að kæmi en kjörtímabil Medvedevs rennur út árið 2012.

„Var einhver samkeppni [milli hans og Medvedevs] árið 2007? Nei. Þá mun það ekki verða 2012,“ sagði Pútín. Hann brosti breitt að sögn The Guardian og bætti við: „Við munum verða sammála af því að við erum nákvæmlega sömu gerðar.“ Hann sagði að þeir myndu íhuga öll atriði þegar kosningar nálguðust, persónuleg áform hvors um sig, álit flokksins sem þeir styðjast við, Sameinaðs Rússlands. Hann ræður mestu á þingi og styður undantekningarlaust tvímenningana.

Pútín varð að víkja 2008 vegna laga sem útilokuðu að sami maður gæti verið lengur forseti en átta ár samfleytt. En stjórnarskránni hefur verið breytt og sá sem kjörinn verður forseti 2012 mun geta setið í sex ár og síðan önnur sex verði hann endurkjörinn.

Medvedev hefur almennt verið álitinn hlýðinn skjólstæðingur Pútíns og oft er fullyrt að hinn síðarnefndi ráði enn í reynd nær öllu bak við tjöldin.

Samt hafa verið vangaveltur um að Medvedev, sem almennt tekur undir með Pútín, hygðist reyna að tryggja sér sinn eigin valdagrundvöll. Hann hefur öðru hverju gefið óljóst í skyn að hann væri ekki sáttur við allt sem Pútín gerir og segir.