Jens Stoltenberg forsætisráðherra Noregs Reuters

Endurkjörnir ríkisstjórnarflokkar Noregs munu ekki kynna nýjan stjórnarsáttmála fyrr en við setningu Stórþingsins eftir fjórar vikur, að því er Jens Stoltenberg forsætisráðherra og formaður Verkamannaflokksins sagði í nótt. Hann sagði að ríkisstjórnarflokkarnir kynnu að starfa saman og var bjartsýnn á áframhaldandi samstarf.

Í nótt sem leið vildi Stoltenberg ekki ræða mannabreytingar í hinni rauðgrænu ríkisstjórn Noregs en gaf í skyn að gerðar yrðu breytingar, að því er vefur Addresseavisen greinir frá. 

Kjósendur lýstu afgerandi stuðningi við Verkamannaflokkinn sem bætti við sig fjórum þingsætum og er nú með 64 þingmenn. Sósíalíski vinstriflokkurinn (SV) tapaði hins vegar jafn mörgum þingsætum og fékk 11 þingmenn. Miðflokkurinn hélt sínum 11 þingmönnum.

Talið er víst að breytingar verði ekki gerðar á ráðherravali fyrr en nýr stjórnarsáttmáli liggur fyrir.  Vangaveltur eru m.a. um að SV tapi einum ráðherrastóli og Miðflokkurinn fái einum fleiri en nú.

Kristin Halvorsen, fjármálaráðherra og formaður SV, telur að SV eigi að njóta sömu áhrifa og í fyrri ríkisstjórn, þrátt fyrir að margir kjósendur hafi snúið baki við flokknum.  Hún segir að flokkurinn hyggist ekki láta af andstöðu sinni við olíuleit í Lófót og Vesterålen.