Hollensk stjórnvöld ætla að draga úr opinberum útgjöldum sem nemur  um 20% til þess að takast á við gríðarlegan fjárlegahalla vegna efnahagskreppunnar. Að sögn Wouter Bos, fjármálaráðherra, þurfa öll ráðuneyti draga saman um 20% fyrir árið 2011. Hollenska þingið kom saman í dag eftir sumarfrí og kynnti Bos fjárlög hollenska ríkisins fyrir næsta ár.

Varaði Bos við því að niðurskurðurinn yrði bæði erfiður og sársaukafullur. „Þetta verður erfitt," sagði Bos á þinginu í dag og sagði þetta niðurstöðu þess að verja landið þegar efnahagskreppan skall á. Nú sé komið að skuldadögum. „Hjá því verður ekki komist að við verðum að fara fram á framlög frá öllum," sagði Bos. 

Ekki eru nema tólf mánuðir síðan er Bos tilkynnti að efnahagur landsins væri mjög góður og að ríkissjóður yrði rekinn með hagnaði árið 2009 og næstu þrjú ár á eftir.

En nú hljóðar fjárlagahallinn fyrir árið 2010 upp á 36,5 milljarða evra sem er svipað og 6,3 af vergri landsframleiðslu. Opinberar skuldir verði 381 milljarður evra á næsta ári sem samsvarar 65,7% af vergri landsframleiðslu. Þar af eru um 50 milljarðar evra stuðningur stjórnvalda til fjármálageirans.

Ekki er gert ráð fyrir hagvexti á næsta ári og að atvinnuleysi mælist 8%. „Það þýðir að yfir 600 þúsund manns verða án atvinnu," að því er segir í fjárlögum hollenska ríkisins.