Tveir breskir unglingar voru í dag sýknaðir af ákæru um að hafa skipulagt fjöldamorð í skóla sínum þegar tíu ár voru liðin frá fjöldamorðunum í Columbine menntaskólanum í Bandaríkjunum.

Matthew Swift, 18 ára, og Ross McKnight, 16 ára, voru ákærðir fyrir að hafa ætlað að sprengja sprengju í verslunarmiðstöð í nágrenni Audenshaw menntaskólans og fremja fjöldamorð í skólanum.

Það tók hins vegar dómara við héraðsdóm í Manchester einungis 45 mínútur að hafna ákæru saksóknara gegn piltunum að þeir hafi ætlað að fremja fjöldamorð í anda Columbine morðanna.

Faðir McKnight 's var að vonum ánægður þegar dómarinn kvað upp úrskurð sinn og segist aldrei hafa verið í vafa um sakleysi piltanna. Hann er lögregluþjónn og segir ákæruna hafa verið hreint út sagt fáránlega þar sem hvorugur piltanna hafi nokkurn tíma komist í kast við lögin þrátt fyrir það hafi þeir þurft að dúsa í fangelsi í sex mánuði.

Þrettán voru myrtir og 23 særðust þegar tveir unglingar, Eric Harris og Dylan Klebold, frömdu fjöldamorð í Columbine skólanum þann  20. apríl 1999. 

Sögðu saksóknarar að Knight, sem er nemandi við Audenshaw menntaskólann og fyrrum nemandi skólans, Swift, hafi ætlað sér að fremja hliðstæð fjöldamorð þann 20. apríl sl.