Mahmoud Ahmadinejad forseti Írans. Reuters

Mahmoud Ahmadinejad, forseti Írans, segir að land hans sjái ekki neina þörf fyrir að eignast kjarnorkuvopn. Hann er  hins vegar harður á því að Íranir muni ekki láta af því að beisla kjarnorku, samkvæmt fréttavef BBC.

Mahmoud Ahmadinejad var í viðtali við bandarísku NBC sjónvarpsstöðina. Í viðtalinu þvertók Ahmadinejad ekki fyrir þann möguleika að Íran muni eignast kjarnorkuvopn. Hann sagði einfaldlega að það væri ekki hluti af áformum eða áætlunum Írana.

Þegar rætt var um kjarnorkuáætlun Írana sagði Ahmadinejad að land hans myndi ekki láta undan þrýstingi Sameinuðu þjóðanna, Bandaríkjanna og Evrópuríkja. Vesturlönd hafa sakað Írani um að vera að smíða kjarnorkuvopn en Íranir hafa neitað því.

Stjórnvöld á Vesturlöndum hafa krafist þess að Íranir hætti að auðga úran, en stjórnvöld í Teheran segja að það sé einungis gert í friðsamlegum tilgangi.  Ahmadinejad á að ávarpa allsherjarþing Sameinuðu þjóðanna í næstu viku. Þá munu Íranir ræða kjarnorkuáætlun sína við heimsveldin í næsta mánuði.

Íranskar öryggissveitir hafa verið settar í viðbragðsstöðu vegna  fjöldafundar sem talið er að forystumenn stjórnarandstöðunnar muni sækja. Forystumenn stjórnarandstöðunnar sem véfengja réttmæti endurkjörs Ahmadinejads í júní s.l. hafa skorað á fylgismenn sína að fjölmenna á fjöldafundinn sem haldinn er til að sýna málstað Palestínumanna stuðning.