Leiðindi og lítil tilþrif þóttu einkenna sjónvarpskappræður Angelu Merkel, kanslara Þýskalands, og helsta keppinautar hennar um kanslarasætið, utanríkisráðherrans Franks-Walters Steinmeiers.

Niðurstöður skoðanakannana vegna þingkosninganna, sem haldnar verða hinn 27. september, sýna þó að leiðindin báru töluverðan árangur. Kristilegir demókratar (CDU) Angelu Merkel bættu nefnilega við sig tveimur prósentustigum í kjölfarið og jafnaðarmenn (SPD) Steinmeiers þremur stigum.

Óánægjuraddir heyrast frá flokkssystkinum Merkel sem segja kanslarann ekki hafa gefið nægilega skýrar línur í baráttunni. Fjölmiðlar segja baráttuna eins og háða undir áhrifum róandi lyfja og hefur hún einnig verið kölluð „þægindaherferðin“.

Brostnir draumar enn á ný?

Áhrifamenn innan systurflokks Merkel, CSU, eru að sögn Süddeutsche Zeitung heldur farnir að ókyrrast. Þeir eru hræddir um að ósköpin frá því í þingkosningunum 2005 endurtaki sig. Þá var staðan skömmu fyrir kosningar alveg eins og hún er nú rúmri viku fyrir kosningar: SPD átti í vök að verjast en CDU og Frjálslyndir demókratar (FDP) voru nokkuð öruggir með að ná takmarki sínu um meirihluta á þinginu.

Niðurstöður kosninganna voru langvarandi áfall: „Kvöldið áður hringdu kosningarýnar í mig og sögðu mér að hafa engar áhyggjur,“ segir liðsmaður CDU við Die Zeit. Niðurstöðurnar gerðu drauma um stjórnarsamstarf með frjálslyndum að engu en Merkel varð kanslari í stjórn með jafnaðarmönnum.

Draumar Merkel um hreinan þingmeirihluta með frjálslyndum þykja hafa dofnað nokkuð. Frjálslyndir komu illa út úr nýrri skoðanakönnun í vikunni og misstu tvö prósentustig. Frjálslyndir og Kristilegir demókratar eru því nú með 49% fylgi en Jafnaðarmenn, Græningjar og Vinstriflokkurinn ná samtals 45%.

Kristilegir demókratar virtust vakna af dásvefninum um stundarsakir í gær er þeir kynntu skattastefnu sína sem þykir þó að mestu leyti snúast um gagnrýni á skattastefnu jafnaðarmanna. Farið er yfir skattaáætlanir Steinmeiers og félaga í fimm liðum og lögð áhersla á að þau áform muni koma illa niður á millistéttinni. Útspil sem líklega á að undirstrika betur að CDU vilji ekki halda stjórnarsamstarfinu áfram með jafnaðarmönnum.

Angela Merkel gælir nú við að sækja G-20-ráðstefnuna í Pittsburg í næstu viku, aðeins fjórum dögum fyrir kosningar. Óánægjuraddir segja það misráðið, eitthvað gæti farið úrskeiðis og sæti kanslarakandídatinn þá við hliðina á Barack Obama og gæti ekkert aðhafst.

Smokkar í flokkslit

Brauðristar, smokkar fyrir samkynhneigða jafnt sem gagnkynhneigða, snýtibréf, plástrar, upptakarar, varasalvi og skóáburður.

Í fyrsta sinn í ár hafa allir flokkarnir sem bjóða fram til þýsku þingkosninganna eigin netverslanir fyrir auglýsingavarning. Jafnaðarmenn þykja í fararbroddi hvað þetta varðar og eru um 300 vörutegundir til sölu, SPD-brauðristar hafa verið til sölu í um tvö ár.

Kristilegir demókratar eru heldur íhaldssamari og halda sig við hefðbundna bolla og kúlupenna. Vinstriflokkurinn býður m.a. sósíalískar bókmenntir og fána.