Mahmoud Ahmadinejad, forseti Írans. Reuters

Mahmoud Ahmadinejad, forseti Írans, sagðist í dag vera stoltur af því að ummæli hans um að helför gyðinga væri goðsögn hafi reitt fjölmarga til reiði. Þetta er haft eftir forsetanum aðeins nokkrum dögum áður en hann mun ávarpa allsherjarþing Sameinuðu þjóðanna.

„Við erum stoltir af því að atvinnumorðingjar heimsins séu reiðir,“ hefur ríkisfréttastofan IRNA eftir Ahmadinejad, en svo virðist sem að ummælin beinst gegn Ísraelum og Bandaríkjamönnum.

Forsetinn ávarpaði fjöldafund til stuðnings Palestínumönnum á föstudag, og  þá ítrekaði hann að helförin væri uppspuni. Vesturveldin hafa gagnrýnt forsetann harðlega fyrir þetta. 

„Grundvöllur þess að setja á fót síonistastjórn byggir á lygi [...] lygi sem reiðir sig á óáreiðanlega kröfu, goðsagnakennda kröfu, og hernámið í Palestínu hefur ekkert með helförina að gera,“ sagði Ahmadinejad.

Bandaríkjastjórn sagði að ummælin væru tilhæfulaus, fávís og hatursfull. Evrópusambandið sagði að þau myndu m.a. hvetja til gyðingahaturs.

Þrátt fyrir að Ahmadinejad hafi varið ummæli sín þá hefur aðstoðarmaður hans haldið því fram að forsetinn muni boða frið á fundi allsherjarþingsins.

„Friður og vinátta allra þjóða, sem byggja á réttlæti og virðingu, eru aðalskilaboð hans,“ hefur IRNA eftit Mohammad Jaffar Mohammad Zadeh, sem er upplýsingafulltrúi forsetans.