Barack Obama, Bandaríkjaforseti, sagði eftir fund sem hann átti með Benjamin Netanyahu, forsætisráðherra Ísraels, og Mahmud Abbas, forseta Palestínumanna, í New York í kvöld, að Ísraelsmenn og Palestínumenn gætu ekki haldið áfram að taka varfærin skref fram á við og höfra síðan aftur.

„Árangur byggist á að allir aðilar geri sér grein fyrir því að það má engan tíma missa," sagði hann. „Það er löngu tímabært að hefja friðarviðræður."

Abbas sagði eftir fundinn, að Palestínumenn hefðu lagt áherslu á að Ísraelsmenn standi við skuldbindingar sínar, einkum um að hætta uppbyggingu gyðingabyggða á herteknu svæðunum. Þá yrðu Ísraelsmenn að hverfa til baka að landamærum eins og þau voru 4. júní 1967 fyrir sex daga stríðið svonefnda. 

Þetta var í fyrsta skipti, sem Netanyahu á fund með Abbas eftir að hann tók við embætti forsætisráðherra í Ísrael fyrr á þessu ári. Ekki ríkir mikil bjartsýni um að Bandaríkjastjórn takist, að fá Ísraelsmenn og Palestínumenn að samningaborðinu á þessu ári.